កិច្ចប្រជុំសាមញ្ញរបស់ក្រុមប្រឹក្សាជាតិកម្ពុជាដើម្បីកុមារលើកទី១ អាណត្តិទី៧ នៃរាជរដ្ឋាភិបាលកម្ពុជា

ទីស្តីការក្រសួង ស.អ.យ.៖ រសៀលថ្ងៃទី១០ ខែមេសា ឆ្នាំ២០២៥ អគ្គលេខាធិការដ្ឋា​នក្រុមប្រឹក្សាជាតិកម្ពុជាដើម្បីកុមារ (ក.ជ.ក.) បានរៀបចំកិច្ចប្រជុំសាមញ្ញរបស់ក្រុមប្រឹក្សាជាតិកម្ពុជាដើម្បីកុមារលើកទី១ អាណត្តិទី៧ នៃរាជរដ្ឋាភិបាលកម្ពុជា។

កិច្ចប្រជុំធ្វើឡើងក្នុងគោលបំណងដើម្បី៖(១) ជម្រាបជូនពីសមិទ្ធផលការងារនៃការដឹកនាំរបស់ក្រុមប្រឹក្សាជាតិកម្ពុជា​​ដើម្បីកុមារឆ្នាំ​២០២៤ សម្រាប់អាណតិ្ត ឆ្នាំ២០២៤-២០២៨ ព្រមទាំងសុំការអនុម័តលើផែនការសកម្មភាពជាតិស្តីពីការទប់ស្កាត់ និងឆ្លើយតបចំពោះអំពើហិង្សាលើកុមារ២០២៥-២០៣០ និង(២)  ការកំណត់ទិសដៅជាយុទ្ធសាស្រ្តរបស់ ក.ជ.ក និងផែនទីចង្អុលបង្ហាញ ដល់អគ្គលេខាធិការដ្ឋាន ក.ជ.ក. ក្នុងការជំរុញការអនុវត្តសិទ្ធិកុមារ និងកិច្ចការពារកុមារ ស្របតាមបទដ្ឋានជាតិ និងអន្តរជាតិដែលមានជាធរមាន​នៅកម្ពុជា។ ​

កិច្ចប្រជុំប្រព្រឹត្តិទៅក្រោមអធិបតីភាពដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្ត្រី ក្រសួងសង្គមកិច្ច អតីតយុទ្ធជន ​និងយុវនីតិសម្បទា និងជាប្រធាន ក.ជ.ក. និងមានការអញ្ជើញចូលរួមពី ឯកឧត្តម លោកជំទាវ លោក លោកស្រី សរុប ចំនួន ៥៦នាក់ ។