វេទិកាកុមារ និងអ្នកធ្វើគោលនយោបាយ

ទីស្តីការក្រសួង​ ស.អ.យ. ព្រឹកថ្ងៃទី០៧  ខែឧសភា  ឆ្នាំ២០២៥ អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមា​រ (ក.​ជ.ក.)  សហការជាមួយអង្គការ World Vision International Cambodia) និងអង្គការ ERIKS បានរៀបចំវេទិកាកុមារ និងអ្នកធ្វើគោលនយោបាយ ក្រោមប្រ​ធា​នបទ “បញ្ឈប់អំពើហិង្សាលើកុមារគ្រប់ទម្រង់ គឺជាការអភិវឌ្ឍធនធានមនុស្សប្រកបដោយចីរភាព” ក្នុងគោលបំណង ដើម្បីលើកកម្ពស់ការចូលរួមរបស់កុមារក្នុងដំណើរការ​រៀប​ចំគោលនយោបាយ និងចែករំលែកនូវវឌ្ឍនភាព បញ្ហាប្រ​ឈ​ម និងការដោះស្រាយ​បញ្ហា​ផ្សេង​ៗ​ដែល​កុមារ​កំពុង​ជួបប្រទះ។

វេទិកានេះបានផ្តល់ឱកាសឱ្យកុមារបានលើកឡើងនូវសំណួរ និងសំណូមពរមួយចំនួនដែលពាក់ព័ន្ធនឹងបញ្ហាអំពើហិង្សាលើកុមារគ្រប់ទម្រង់ ទៅកាន់វាគ្មិនចំនួន ៥រូប កមពី ក្រសួង ស្ថាប័នពាក់ព័ន្ធ។ ​ជាមួយគ្នានេះ វាគ្មិនទាំងអស់បានបង្ហាញអំពីវឌ្ឍនភាពការងារ និងកិច្ចខិតខំប្រឹងប្រែងរបស់រាជរដ្ឋាភិបាល ពាក់ព័ន្ធនឹងការដាក់ចេញនូវ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយ ច្បាប់ លិខិតបទដ្ឋានគតិយុត្ត ផែនការសកម្មភាពនានា និងការពង្រឹងយន្តការកិច្ចការពារកុមារប្រទាក់ក្រឡាជាពហុវិស័យនៅថ្នាក់ជាតិនិងថ្នាក់ក្រោមជាតិ ដើម្បីទប់ស្កាត់ អំពើហិង្សាលើកុមារគ្រប់ទម្រង់ និងការអភិវឌ្ឍធនធានមនុស្សប្រកបដោយចីរភាព។

ទន្ទឹមនឹងនេះ លទ្ធផលដែលបានមកពីវេទិកា នឹងត្រូវរៀបចំជាសេចក្តីថ្លែងការណ៍រួមរបស់កុមារ​ ដើម្បីថ្លែងការណ៍ ទៅកាន់ប្រមុខរាជរដ្ឋាភិបាល នៅក្នុងពិធីមីទ្ទីងអបអរសាទរខួបលើក​ទី៧៦ ទិវាកុមា​រ​​អន្តរជាតិ១មិថុនា ខួបលើកទី២៤ ទិវាពិភពលោកប្រឆាំងពលកម្មកុមារ១២មិថុនា និងទិវាកុមារកម្ពុជាឆ្នាំ២០២៥  និងយកសេចក្តីថ្លែងការណ៍នេះ ដាក់បញ្ចូលទៅក្នុងផែងការរបស់ក្រសួង ស្ថាប័ន និងអង្គការដៃគូពាក់ព័ន្ធ ដើម្បីរួមគ្នាជួយដោះស្រាយបញ្ហារបស់កុមារ។

​វេទិការនេះមានវេទិកានេះប្រព្រឹត្តិទៅក្រោមអធិបតីភាព ​លោកជំទាវ ​ ខៀវ បូរី រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ជា សុមេធី រដ្ឋមន្រ្តីក្រសួង ស.អ.យ. និងជាប្រធាន ក.ជ.ក. និងមានវាគ្មិនចូលរួម ចំនួន ០៥រូប អញ្ជើញមកពីក្រសួងអប់រំ យុវជន និងកីឡា, ក្រសួង ស.អ.យ. ក្រសួងប្រៃសណីយ៍និងទូរគមនាគមន៍ ក្រសួងសុខាភិបាល និងក្រសួងយុត្តិធម៌ និងមានអ្នកចូលរួមជាកុមារ អ្នកថែទាំកុមារ មន្ត្រីរាជរដ្ឋាភិបាល និងអង្គការដៃគូពាក់ព័ន្ធ សរុប ចំនួន ២៧០នាក់ ។