កិច្ចសន្ទនាសហគមន៍ ស្តីពីសុវត្ថិភាពកុមារតាមប្រព័ន្ធអនឡាញ

ខេត្តបាត់ដំបង,ថ្ងៃទី២១ ខែមិថុនា ឆ្នាំ២០២៤ ឯកឧត្តម ណុប ឬទ្ធា អគ្គលេខាធិការរង   តំណាងដ៏ខ្ពង់ខ្ពស់របស់ ឯកឧត្តម គីម សុវណ្ណឌី អគ្គលេខាធិការ នៃ​អគ្គលេខាធិការដ្ឋាន ក.ជ.ក បានចូលរួមជាវាគ្មិន កិច្ចសន្ទនាសហគមន៍ ស្តីពីសុវត្ថិភាពកុមារតាមប្រព័ន្ធអនឡាញ ។ កិច្ចសន្ទនានេះរៀបចំឡើងក្នុងគោលបំណង ដើម្បីឲ្យកុមារបានចូលរូមបញ្ចេញនូវមតិយោបល់ បញ្ហាប្រឈម និងបានសួរសំណូរនៅកាន់វាគ្មិនអំពីយន្តការការពារ និងដំណោះស្រាយរាល់បញ្ហាពាក់ព័ន្ធនឹងសុវត្ថិភាពកុមារតាមប្រព័ន្ធអនឡាញ។

ជាមួយគ្នានោះ តំណាងកុមារបានជូននូវសំណូរពរមួយចំនួនដល់អគ្គលេខាធិការដ្ឋាន ក.ជ.ក  ក៏ដូចជាតំណាងអាជ្ញាធរខេត្តបាត់ដំបង សូមគាំទ្រនូវសកម្មភាពមួយចំនួន ពាក់ព័ន្ធនឹងសុវត្តិភាពកុមារតាមប្រព័ន្ធអនឡាញ។ ឆ្លើយតបទៅនឹងសំណើតំណាងរបស់កុមារ តំណាងវាគ្មិនអាជ្ញាធរមូលដ្ឋានបានទទួលយក និងធ្វើការ​ប្តេជ្ញាយក​សំណូមពរនោះទៅពិនិត្យ និងដាក់ចូលក្នុងផែនការប្រតិបត្តិរបស់ខ្លួន ពាក់ព័ន្ធនឹងការបង្ការ ទប់ស្កាត់ និងឆ្លើយតបទៅសុវត្ថិភាពកុមារតាមប្រព័ន្ធអនឡាញ។

កិច្ចសន្ទនានេះ មានវាគ្មិនចូលរួម ចំនួន ៦រូប ជាអភិបាលរងខេត្ត, គណៈកម្មាធិការខេត្តប្រយុទ្ធ​ប្រឆាំង​អំពើ​ជួយ​ដូរមនុស្ស, មន្ទីរកិច្ចការនារី, តំណាង​អង្គការ ChildFun Cambodia តំណាងអង្គការ OEC និងមានអ្នកចូលរួមជាតំណាងកុមារ លោកគ្រូ អ្នកគ្រូ ឪពុកម្តាយ សរុប ចំនួន ៦០ នាក់ ។