សន្និសីទថ្នាក់ជាតិស្តីពីការចូលរួមរបស់កុមារ និងយុវជន

សណ្ឋាគារកាំបូឌីយ៉ាណា-ថ្ងៃទី២៨ ខែកុម្ភៈ ឆ្នាំ២០២៥ អគ្គលេខាធិការដ្ឋា​នក្រុមប្រឹក្សាជាតិកម្ពុជាដើម្បីកុមារ (ក.ជ.ក.) សហការជាមួយអង្គការដែនដីមនុស្សហូឡង់ដ៏ និងអង្គការ​ ERIKS បានរៀបចំសន្និសីទថ្នាក់ជាតិស្តីពីការចូលរួមរបស់កុមារ​ និងយុវជន។

សន្និសីទរៀបចំឡើងក្នុងគោលបំណង (១) ដើម្បីចែករំលែកនូវបទពិសោធន៍​ និងការអនុវត្តល្អៗរបស់កុមារ​ និងយុវជន​ ដែលបាននឹងកំពុងចូលរួមយ៉ាងសកម្មក្នុងការទប់ស្កាត់​ អន្តរាគមន៍​ ឆ្លើយតប​ និងសេវាគាំទ្រចំពោះកុមារ​ដែលរងនូវអំពើហិង្សានិងការបង្ហាញ​ពីការចូលរួមរបស់កុមារ​ និងយុវជន​ ក្នុងនាមជាម្ចាស់សិទ្ធិ​ លើការលើកកម្ពស់សិទ្ធិ​ និងឧត្តមប្រយោជន៍របស់ខ្លួន​ និង(២) ធ្វើការវាយតម្លៃ​ និងស្ទង់មតិ​លើគំនិតផ្តួចផ្តើមក្នុងការបង្កើតក្រុមការងារកុមារ​ និងយុវជនថ្នាក់ជាតិ​ ដើម្បីបង្ហាញអំពីឆន្ទ:​គាំទ្រ​ និងពង្រឹង​ការចូលរួមរបស់កុមារកម្ពុជា​ ទាំងថ្នាក់ជាតិ​ និងសកល​។

សន្និសីទនេះប្រព្រឹត្តិទៅក្រោមអធិបតីភាព លោកជំទាវ ខៀវ បូរី រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអនុប្រធាន ក.ជ.ក. និងមានការអញ្ជើញចូលរួមពី  ឯកឧត្តម លោកជំទាវ លោក លោកស្រីតំណាងមកពីក្រសួង​ ស្ថាប័ន អង្គការដៃគូអភិវឌ្ឍន៍ពាក់ព័ន្ធ លោកគ្រូ​  អ្នកគ្រូ​ កុមារ​ និងយុវជន​ មកពីសាលារៀនរដ្ឋ​ និងឯកជន​ សរុបចំនួន ១៣០រូប។