កិច្ចប្រជុំឆ្លុះបញ្ចាំងអំពីវឌ្ឍនភាពនៃការអនុវត្តគម្រោងសុវត្ថិភាពកុមារតាមប្រព័ន្ធអនឡាញ (SWIPE SAFE Project)។

សណ្ឋាគារសាន់វេ, ថ្ងៃទី២៨ ខែមេសា ឆ្នាំ២០២៥ អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ (ក.ជ.ក.) សហការជាមួយអង្គការឆាលហ្វាន កម្ពុជា បានរៀបចំកិច្ចប្រជុំឆ្លុះបញ្ចាំង ពិនិត្យលើវឌ្ឍនភាពនៃការអនុវត្តគម្រោងសុវត្ថិភាពកុមារតាមប្រព័ន្ធអនឡាញ (SWIPE SAFE Project) ។

កិច្ចប្រជុំរៀបចំឡើងក្នុងគោលបំណង ៖ (១)- ដើម្បីបង្ហាញអំពីលទ្ធផល បញ្ហាប្រឈម ការចែករំលែកបទពិសោធន៍ និងចំណេះដឹងនៃការអនុវត្តគម្រោងកិច្ចការពារកុមារតាមប្រព័ន្ធអនឡាញ របស់ក្រសួង ស្ថាប័នពាក់ព័ន្ធ និងអង្គការដៃគូ (២)- ដើម្បីពិភាក្សាស្វែងរកយុទ្ធសាស្ត្ររួម ក្នុងការកម្ពស់ប្រសិទ្ធភាពកិច្ចការពារកុមារតាមប្រព័ន្ធអនឡាញ និងការពង្រឹង និងពង្រីកតំបន់គោលដៅនៃការអនុវត្តគម្រោងសុវត្ថិភាពកុមារតាមប្រព័ន្ធអនឡាញបន្ត។

កិច្ចប្រជុំនេះ គឺជាវេទិកាដ៏សំខាន់មួយសម្រាប់ឆ្លុះបញ្ចាំងពីការអនុវត្តការងារពាក់ព័ន្ធនឹងសុវត្ថិភាពកុមារតាមប្រព័ន្ធអនឡាញនាពេលបច្ចុប្បន្ន និងជាកិច្ចសហការគ្នា ដើម្បីបង្កើតយុទ្ធសាស្រ្តដ៏មានប្រសិទ្ធភាពមួយ ក្នុងការការពារកុមារក្នុងយុគសម័យឌីជីថល។ តាមរយៈការឆ្លុះបញ្ចាំងនេះ យើងនឹងអាចពង្រីកការគាំទ្រចំពោះសុវត្ថិភាពកុមារតាមប្រព័ន្ធអនឡាញ តាមរយៈការអប់រំ ផ្សព្វផ្សាយអំពីបរិយាកាសអនឡាញដែលមានសុវត្ថិភាព និងផ្តល់សិទ្ធិអំណាចកាន់តែច្រើនសម្រាប់កុមារ ជាពិសេសយន្តការឆ្លើយតប និងកិច្ចគាំទ្រនានាចំពោះកុមារដែលរងការរំលោភបំពាន និងកេងប្រវ័ញ្ចតាមប្រព័ន្ធអនឡាញ។

កិច្ចប្រជុំប្រព្រឹត្តិទៅក្រោមអធិបតីភាពឯកឧត្តម​ គីម​ សុវណ្ណឌី​ អគ្គលេខាធិការនៃអគ្គលេខាធិការដ្ឋាន ក.ជ.ក. តំណាងដ៏ខ្ពង់ខ្ពស់របស់ឯកឧត្តម ជា សុមេធី រដ្ឋមន្រ្តីក្រសួង ស.អ.យ. និងជាប្រធាន ក.ជ.ក. និងមានការអញ្ចើញចូលរួមពី ឯកឧត្តម លោកជំទាវ លោក លោកស្រី តំណាងមកពីក្រសួង ស្ថាប័ន អង្គការដៃគូអភិវឌ្ឍន៍ពាក់ព័ន្ធនានា សរុប ចំនួន ៥០នាក់។

សូមបញ្ជាក់ថាៈ អគ្គលេខាធិការដ្ឋាន ក.ជ.ក. សហការជាមួយអង្គការឆាលហ្វាន កម្ពុជា បានរៀបចំនូវសៀវភៅមេរៀន និងសម្ភារៈឧបទ្ទេសសម្រាប់បណ្តុះបណ្តាលស្តីពីសុវត្ថិភាពកុមារតាមប្រព័ន្ធអនឡាញ តាមរយៈគម្រោងកម្មវិធី Swipe Safe តាំងពីនៅដើមឆ្នាំ២០២៣។ ការរៀបចំសៀវភៅមេរៀន និងសម្ភារៈឧបទ្ទេសសម្រាប់បណ្តុះបណ្តាលស្តីពីសុវត្ថិភាពកុមារតាមប្រព័ន្ធអនឡាញ ត្រូវបានបែងចែកជាកញ្ចប់មេរៀន ៤ប្រភេទ ដោយផ្តោតទៅលើក្រុមគោលដៅដូចខាងក្រោម រួមមាន៖ ១)- សៀវភៅសម្រាប់បណ្តុះបណ្តាលគ្រូបង្គោល, ២)- សៀវភៅសម្រាប់បណ្តុះបណ្តាលកម្លាំងសេវាសង្គមកិច្ច, ៣)- សៀវភៅសម្រាប់បណ្តុះបណ្តាលឪពុកម្តាយ អាណាព្យាបាល និងអ្នកថែទាំ និង៤)- សៀវភៅមេរៀនសម្រាប់បណ្តុះបណ្តាលកុមារវ័យជំទង់ និងយុវជន។ ការអភិវឌ្ឍសៀវភៅមេរៀន និងសម្ភារៈឧបទ្ទេសសម្រាប់បណ្តុះបណ្តាលនេះ បានដកស្រង់ចេញពីគំរូមេរៀនសុវត្ថិភាពកុមារតាមប្រព័ន្ធអនឡាញថ្នាក់តំបន់អាស៊ីប៉ាស៊ីហ្វិក ដែលបានអនុវត្តចាប់ពីឆ្នាំ២០១៧ កន្លងមកតាមរយៈគម្រោង Swipe Safe របស់អង្គការឆាលហ្វាន ដោយបានកែសម្រួលខ្លឹមសារឱ្យស្របតាមបរិបទសមភាពយេនឌ័រ ពិការភាព និងបរិយាបន្នសង្គម។

ការបណ្តុះបណ្តាលស្តីពីសុវត្ថិភាពកុមារតាមប្រព័ន្ធអនឡាញនេះ មានគោលដៅពង្រឹងចំណេះដឹងដល់កម្លាំងសេវាសង្គម ឪពុកម្តាយ និងកុមារវ័យជំទង់ ឱ្យយល់ដឹងអំពីវិធីសាស្ត្រនៃការប្រើប្រាស់អ៊ីនធឺណិតប្រកបដោយសុវត្ថិភាព មានការទទួលខុសត្រូវ និងចេះការពារខ្លួនពីការរំលោភបំពានផ្សេងៗតាមប្រព័ន្ធអនឡាញ ជាពិសេសអ្នកចូលរួមទទួលការបណ្តុះបណ្តាលអាចយល់ដឹងពីការស្វែងរកជំនួយ និងការឆ្លើយតបពេលមានបញ្ហាប្រឈមកើតឡើងនៅតាមប្រព័ន្ធអនឡាញ។